TRANSLATION: Unsound projects by Dr. Farrukh Saleem

Unsound projects

ناپائیدار حکمت عملیاں!

جنگ کے اہداف نہیں بلکہ جنگ کے ہتھیار بدل گئے ہیں۔ تبدیلی یہ آئی ہے کہ اب فوجیں فتوحات نہیں کرتیں۔ کسی ملک کی اقتصادی حالت اِس حد تک غیرمستحکم‘ ناپائیدار‘ غیرمضبوط‘ ناقص اور لاغر کردی جاتی ہے کہ وہ گھٹنے ٹیک دے۔ 1970ء کی دہائی میں امریکہ کے صدر رچرڈ نکسن (Richard Nixon) نے خفیہ ادارے ’سی آئی اے‘ کو حکم دیا تھا کہ ’’چلی کی اقتصادیات کا بیڑا غرق کردیا جائے۔‘‘ یہ راز امریکہ حکومت کی خفیہ خط و کتابت سے معلوم ہوئی اور جب ہم موجودہ صورتحال میں پاکستان کی اقتصادیات کا جائزہ لیتے ہیں تو معلوم ہوتا ہے کہ یہ بھی قابل بیان حالت میں نہیں ہے۔

پاکستان کے سیاسی فیصلہ سازوں کا طرزعمل رہا ہے کہ یہ ملک پر قرضوں کے بوجھ میں اضافہ کرتے چلے جا رہے ہیں۔ ہر سال پہلے سے موجود قرضوں کی ایک تہہ (پرت) بڑھ جاتی ہے۔ حقیقت یہ ہے کہ قرضوں پر منحصر اقتصادی نظام مرتب کرکے پاکستان کی سلامتی کو خطرے میں ڈال دیا گیا ہے۔

ہم سب عینی شاہد ہیں کہ سیاسی حکومتوں نے سیاسی مفادات کے لئے ایسے ترقیاتی منصوبوں میں حد سے زیادہ مالی سرمایہ کاری کی‘ جن کے فوائد محدود اور ان سے اقتصادی لاغرپن کا علاج ممکن نہیں۔ ستائیس کلومیٹر طویل اورنج لائن منصوبہ‘ لائٹ ریل ریپیڈ ٹرانزٹ سسٹم پر لاگت کا تخمینہ 162 ارب روپے لگایا گیا ہے۔ اگر ہم اِس رقم کو مسافروں پر منتقل کریں تو فی ٹکٹ 175 روپے کا بنے گا جبکہ حکومت نے فی ٹکٹ قیمت ’20 روپے‘ مقرر کی ہے اور اس قدر کم قیمت مقرر کرنے سے یومیہ چار کروڑ روپے جبکہ سالانہ ’چودہ ارب روپے‘ خسارہ ہوگا۔ علاؤہ ازیں چار ارب روپے اِس نظام کی دیکھ بھال اور اسے فعال کرنے کے لئے الگ سے درکار ہوں گے۔ تصور کیجئے کہ چین سے حاصل کردہ قرضہ رعائتی شرائط پرہے لیکن اس کی مالیت اور اِس پر سود کی ادائیگی 10ارب روپے سالانہ بوجھ کا باعث بنے گی۔ ذہن نشین رہے کہ زیادہ خطرے کی بات یہ ہے کہ چین سے حاصل کردہ قرضہ جات اور اِن قرضہ جات پر سود کی ادائیگی ڈالرز میں کرنا ہوگی جبکہ دوسری طرف اِس قرض سے بنایا جانے والے ترقیاتی منصوبے سے بھی یومیہ بنیادوں پر خسارہ ہوگا!

تصور کیجئے کہ حکومت پاکستان نے ضمانت دی ہے کہ وہ ’تھر کول بلاک ون‘ پاور جنریشن کمپنی پرائیویٹ لیمٹیڈ سالانہ 34.49فیصد ادائیگی کرے گی۔ اس منصوبے کی کل لاگت 767 ملین ڈالر ہے جس میں 575 ملین ڈالر قرض شامل ہے۔ اِسی طرح ’ساہیوال کول پاور پراجیکٹ‘ کے لئے حکومتی ضمانت 27.2فیصد ہے۔ اس منصوبے پر کل لاگت کا تخمینہ 956 ملین ڈالر ہے جس میں 723 ملین ڈالر قرض شامل ہے۔

بجلی کی کمی سے صنعتیں متاثر ہو رہی ہیں لیکن اگر اِن صنعتوں کو مہنگے داموں بجلی فراہم کی جائے گی تو پیداواری صلاحیت اور پیداواری اخرجات بڑھنے سے پاکستانی مصنوعات ملکی یا غیر ملکی منڈیوں میں قیمتوں کا مقابلے کرنے کے قابل نہیں رہیں گی۔ جس کی وجہ سے برآمدات میں کمی آتی چلی جائے گی جبکہ حکومت پر قرضوں کا بوجھ بڑھتا چلا جائے گا۔ نندی پور منصوبے پر لاگت کا تخمینہ 329 ملین ڈالر سے بڑھ کر 847ملین ڈالر ہو چکا ہے۔ نیلم جہلم منصوبے پر لاگت 15ارب روپے سے بڑھ کر 414 ارب روپے ہو چکی ہے۔ نیو اسلام آباد ائرپورٹ منصوبے پر لاگت 37ارب روپے سے بڑھ کر 100 ارب روپے ہو چکی ہے۔ نندی پور پاور پراجیکٹ میں فرنس آئل سے حاصل ہونے والی بجلی کی قیمت 18.17 روپے فی کلوواٹ‘ ہائی اسپیڈ ڈیزل سے 27.91 روپے فی کلوواٹ جبکہ گیس سے 8.44 روپے فی کلوواٹ ہے۔

القصہ مختصر پاکستان میں ایک سے بڑھ کر ایک ایسا ترقیاتی منصوبہ تخلیق اور شروع کیا گیا جس سے حاصل ہونے والے نتائج ’ناپائیدار‘ ہیں۔ آج کی دنیا میں ’قرض‘ ایک نیا جنگی ہتھیار ہے۔ جس کے ذریعے اقتصادی ہنگامی حالت کا نفاذ ہوتا ہے جس کے اپنے سیاسی اہداف ہوتے ہیں۔ انہی ناپائیدار و غیرحقیقی اہداف والے ترقیاتی منصوبوں ے باعث کوئی ملک تعلیم و صحت جیسے بنیادی شعبے میں خاطرخواہ سرمایہ کاری نہیں کرسکتا اور یہی آج کی دنیا میں جنگوں کی چوتھی ترقی یافتہ (فورتھ جنریشن) صورت ہے۔ آج کی دنیا میں میزائلوں اُور ٹینکوں‘ کی جگہ ’ناپائیدار اقتصادی منصوبوں‘ نے لے لی ہے۔ اب کھلے عام گولہ بارود سے جنگ نہیں ہوتی بلکہ خفیہ انداز میں اقتصادی معاہدے ہوتے ہیں۔ آج کی جنگ میں فوجی نہیں بلکہ اقتصادی محاذ کھل گئے ہیں۔ 

(بشکریہ: دی نیوز۔ تحریر: ڈاکٹر فرخ سلیم۔ ترجمہ: شبیرحسین اِمام)