Oct 2017: Adopting Peshawar Development Authority would be any help for Peshawar?

ژرف نگاہ ۔۔۔ شبیرحسین اِمام

جذبۂ تعمیر زندہ؟

تعمیروترقی کا عمل ’’منصوبہ بندی‘ تسلسل اُور پائیداری‘‘ جیسے اُوصاف (خوبیوں) کا مجموعہ نہ ہو‘ تو سوچ بچار کے بعد نت نئے تخلیقی خیالات اور اَربوں روپے خرچ کرنے کے باوجود بھی خاطرخواہ نتائج برآمد نہیں ہوتے۔ یہی کہانی پشاور کی ہے جس کا (نام نہاد) ترقیاتی اِدارہ ’’ڈویلپمنٹ اتھارٹی (پی ڈی اے)‘‘ ایک نئے روپ میں سامنے آنے والا ہے۔ یہ بات ’پی ڈی اے‘ ملازمین کے لئے خوشخبری تو ہے کہ خیبرپختونخوا حکومت نے ’پی ڈی اے‘ کی پندرہ برس سے جاری محرومی کا خاتمہ کردیا ہے اور اب جلد ہی ’پی ڈی اے‘ کو اُس کا آئینی مقام مل جائے گا لیکن کیا یہ پیشرفت پشاور کے اُس عام آدمی (ہم عوام) کے لئے بھی خوشخبری قرار دی جاسکتی ہے جو انواع واقسام کے مسائل و مشکلات سے دوچار ہے؟ سوال یہ بھی ہے کہ ’پی ڈی اے‘ کو بناء ’آئینی حیثیت‘ جو اختیارات حاصل تھے اُن کا استعمال کرتے ہوئے پشاور کے مفادات کا تحفظ کس حد تک کیا گیا؟ سزأ و جزأ کے بغیر ادارے کی اصلاح ممکن نہیں۔ جن ملازمین کے منہ کو ’بدعنوانی (کرپشن) کا خون لگا ہوا ہے‘ اُن کا احتساب اور اُن سے نجات کے بغیر ’پی ڈی اے‘ کی نشاۃ ثانیہ ممکن نہیں بلکہ یہ خواب ایک خواب ہی رہے گا۔ 

پشاور کے مسائل اور بے ہنگم ترقی کے تناظر میں ’پی ڈی اے‘ کی اب تک کی کارکردگی کیا ہے اور اگر اس ادارے کو آئینی حیثیت مل گئی ہے تو اِس سے کارکردگی پر کیا فرق پڑے گا یعنی کیا بہتری آئے گی؟ کیا توقع کی جاسکتی ہے کہ ’پی ڈی اے‘ کا مستقبل قریب میں سربراہ کسی ایسے شخص کو لگایا جائے گا جس کا دلی تعلق پشاور ہونے کے ساتھ اُس کی قابلیت اور اہلیت صرف ملازمتی تجربہ اور سیاسی وابستگی نہ ہو؟ کیا یہ امر تعجب خیز ہے کہ ایک سے زیادہ صوبائی حکومتیں ایسی بھی رہیں ہیں کہ جنہوں نے ’پی ڈی اے‘ کے سربراہ کی تعیناتی بھاری رشوت کے عوض کی لیکن اِس معلوم حقیقت کے باوجود بھی سیاسی فیصلہ سازوں کا کوئی بھی کچھ نہیں بگاڑ سکا۔ ’پی ڈی اے‘ کے نگران بیرون ملک دوروں اور پرتعیش مقامات پر دیکھے گئے لیکن اُن کے دامن پر بدعنوانی کا ایک بھی دھبہ نہیں پایا گیا۔ سچ تو یہ ہے کہ افسرشاہی پہلے سیاست دانوں کو بدعنوان کرتی ہے اور پھر دونوں ہاتھوں سے سرکاری وسائل کی لوٹ مار کی جاتی ہے۔ 

عام انتخابات میں سرمایہ کاری کرنے والوں کے پیش نظر بھی یہی ہوتا ہے کہ بہرقیمت منتخب ہونے کے بعد سرکاری محکموں کے انتظامی عہدوں پر تعیناتیاں فروخت کی جائیں۔ یہی وجہ ہے کہ ’پی ڈی اے‘ ہر دور حکومت میں صرف سیاسی بنیادوں پر ملازمتوں کا مرکز رہا ہے اور نتیجہ یہ بھی ہے کہ ایک اہم ترین ادارے پر نہ صرف ضرورت سے زیادہ افرادی قوت کا بوجھ ڈال کر اُسے مفلوج کیا گیا بلکہ سیاسی وابستگیوں کی بنیاد پر ہونے والی بھرتیوں کو اپنے احتساب کا ڈر بھی نہیں اور نہ ہی ’جذبۂ تعمیر‘ کا زندہ ہونا شرط (ضروری) ہے!

خیبرپختونخوا قانون ساز اسمبلی میں ’’پشاور ڈویلیپمنٹ اتھارٹی بل 2017ء‘‘ نامی قانون منظوری کے لئے پیش کرنے کی تیاریاں مکمل کر لی گئیں ہیں جس کا بنیادی مقصد ’پی ڈی اے‘ کو قانونی اور خودمختار ادارے کی حیثیت دینا ہے۔ قانونی نکتۂ نظر سے بات کی جائے تو سال 2002ء میں جب حکومت نے ’’خیبرپختونخوا اربن ڈویلپمنٹ بورڈ‘‘ کو تحلیل کرنے کا قانون منظور کیا تھا تب ’پی ڈی اے‘ محکمۂ بلدیات کو سونپ دیا گیا لیکن اِس ادارے سے نفرت کی انتہاء یہ تھی کہ اِسے ایک غیرفعال اِدارہ پکارا گیا۔ جس کے بعد ’پی ڈی اے‘ کا آئینی وجود سوالیہ نشان رہا اور پندرہ برس تک یہ ادارہ اپنی آئینی شناخت اور وجود کی تلاش میں سرگرداں رہا‘ اب جبکہ آئینی حیثیت بحال ہو رہی ہے تو خیبرپختونخوا کمال مہربانی کا مظاہرہ کرتے ہوئے ’پی ڈی اے‘ کے ڈائریکٹر جنرل کے اُن جملہ امور (اُن فیصلوں) کی بھی منظوری دے گی جو پندرہ سال کے دوران مختلف مواقعوں پر صادر کئے جاتے رہے۔ 

حقیقت یہ رہی کہ سیاسی حکمران مختلف ادوار ’پی ڈی اے‘ کی غیرآئینی حیثیت سے بھرپور فائدہ اٹھاتے رہے۔ کارکنوں کی بھرتیاں ہوں‘ ترقیاتی کاموں کے لئے مختص مالی وسائل کی اپنے انتخابی حلقوں میں تقسیم ہو یا بااثر افراد کو بلڈنگ کنٹرول (نئی تعمیرات) کے قواعد و ضوابط سے رعائت دینا ہو‘ صوبائی وزرأ کے اشارے پر سیاہ و سفید کام ہوتے رہے۔ ’پی ڈی اے‘ کے ملازمین کی ایک بڑی تعداد ایسی بھی رہی جو حکمراں سیاسی و غیرسیاسی افراد کے گھروں پر ذاتی ملازمین کی طرح تعینات رہے اور کچھ عجب نہیں کہ ایسے ’بھوت ملازمین‘ آج بھی موجود ہوں! جبکہ ’پی ڈی اے‘ کے افرادی وسائل‘ گاڑیاں اور ایندھن بھی چند افراد کی صوابدید پر رہا لیکن اب اُس ماضی کو دفن کرکے ایک ’نئی شروعات‘ ہونے جا رہی ہے‘ جس میں بہتری کی توقع بہرحال رکھنی چاہئے۔

آئینی حیثیت کے ساتھ ہی ’پی ڈی اے‘ کچھ نئے قواعد و اصولوں کا پابند بھی ہو جائے گا جیسا کہ خیبرپختونخوا کا وزیراعلیٰ (بلحاظ عہدہ) ’پی ڈی اے‘ کا چیئرمین ہوا کرے گا اور اس سے کوئی فرق نہیں پڑتا کیونکہ وزیراعلیٰ کی اسقدر مصروفیات ہوتی ہیں کہ اُنہیں شاید ہی کسی ایک سال کے دوران ایک مرتبہ بھی ’پی ڈی اے‘ اجلاس میں شرکت کی فرصت مل سکے۔ اگر پشاور وزیراعلیٰ کی ترجیح ہوتا تو کسی ’پی ڈی اے‘ یا ضلعی حکومت سے توقعات وابستہ کرنے کی نوبت ہی نہ آتی بہرکیف وزیربلدیات (بلحاظ عہدہ) ’پی ڈی اے‘ کا وائس چیئرمین اور اسپیکر خیبرپختونخوا اسمبلی کسی بھی رکن اسمبلی کو بطور ’رکن (ممبر)‘ پی ڈی اے کی نگران انتظامی باڈی میں شامل کر سکیں گے۔ ضلع پشاور کا ناظم بھی (بلحاظ عہدہ) ’پی ڈی اے‘ کی گورننگ باڈی کا ایک رکن ہوگا۔ یہ ایک خوبصورت (آئیڈیل) انتظامی تشکیل ہے‘ جس میں سیاست دانوں کے ساتھ افسرشاہی (بیوروکریسی) کو بھی حصہ داری دی گئی ہے (پشاور ایک میٹھے کیک جیسا ہے جس کے گرد بیٹھنے والوں کے فرط جذبات سے سرخ چہرے تصور پر حاوی ہیں!) ’پی ڈی اے‘ کی گورننگ باڈی اراکین میں سیکرٹری پلاننگ اینڈ ڈویلپمنٹ‘ سیکرٹری فنانس‘ سیکرٹری بلدیات و دیہی ترقی‘ سیکرٹری جنگلات‘ سیکرٹری ماحولیات اور کمشنر پشاور بلحاظ عہدہ شامل ہوں گے جبکہ ’پی ڈی اے‘ کے فیصلوں کی منظوری ’گورننگ باڈی‘ دیا کرے گی جس میں ہر رکن کو ایک ووٹ دینے کا حق ہوگا اور کسی اجلاس میں موجود اراکین کی تعداد رائے شماری کے ذریعے ترقیاتی امور (ترجیحات) طے کرے گی لیکن ہر اجلاس کے لئے کم سے کم ’’سات اراکین‘‘ کی موجودگی لازمی ہوا کرے گی۔ پشاور پر حکمرانی کرنے والوں کی کبھی بھی کمی نہیں رہی۔ اِن میں افراد بھی ہیں اور ادارے بھی لیکن تیزی سے پھلتے پھولتے پشاور میں جس بے ہنگم انداز سے رہائشی بستیاں تعمیر ہو رہی ہیں اُمید ہے کہ ’پی ڈی اے‘ ریگی للمہ ٹاؤن شپ منصوبے کی تکمیل کے ساتھ یہ معاملہ بھی پیش نظر رکھے گی۔ منتخب بلدیاتی نمائندے (ضلعی حکومت) اور ’پی ڈی اے‘ اگر ٹھان لے تو کوئی وجہ نہیں کہ ’پشاور کو درپیش مسائل (بحرانوں) کی شدت میں نمایاں کمی نہ لائی جا سکے لیکن ’جذبۂ تعمیر‘ کی زندگی اور بیداری کے لئے بھی کوششیں ہونی چاہیءں۔ بذریعہ قانون سازی ’پی ڈی اے‘ میں ’نئی روح‘ نہیں پھونکی جا سکتی اور نہ ہی کسی بوڑھے طوطے کو نئے الفاظ سکھائے جا سکتے ہیں!

۔

Apr2017: Peshawar & Developmental priority!

ژرف نگاہ ۔۔۔ شبیر حسین اِمام

ترجیحات: پشاور کے مفادات!

چین کے سلسلۂ سلاطین ’ٹانگ ڈائنسٹی (Tang dynasty)‘ کا دور بادشاہت 618ء سے 907ء رہا اُور اِس دوران بدھ مت کے ماننے والے چینی مفکر‘ سیاح اُور مترجم ’’شان زانگ (Xuanzang)‘‘ نے پشاور سمیت برصغیر کے اُن مختلف علاقوں کا دورہ کیا‘ جہاں بدھ مت کی عبادت گاہیں قائم تھیں۔ ’شان زانگ (پیدائش 602ء۔ وفات: 664ء)‘ نے ساتویں صدی کے اوائل میں پشاور کا دورہ بھی کیا اُور یہاں بدھ مت کے مرکز کا ذکر کرتے ہوئے بطور خاص اُس عمارت کا ذکر کیا جہاں ’بدھ مت کے بانی گوتم بدھ‘ کے زیراستعمال و منسوب (مقدس) اشیاء جس عبادت گاہ (stupa) میں رکھی گئیں تھیں وہ مقام آج کے پشاور میں ’گورگٹھڑی (Gor Khatri)‘ کہلاتا ہے اُور یہی مقام بدھ مت کے ماننے والوں کے لئے سالانہ مذہبی تہوار کی جگہ بھی تھی جہاں آنے والے یاتری اپنے بال منڈوا کر مذہبی رسومات اَدا کیا کرتے تھے۔ 

پشاور صرف قدیم ترین تاریخی شہر ہی نہیں بلکہ قدیم ترین اور ایک ایسا ’زندہ تاریخی‘ شہر کا درجہ رکھتا ہے جو پورے جنوب مشرق ایشیاء میں ممتاز ہے اور پشاور ہی ’گندھارا تہذیب کا مرکز‘ رہا جس کا ذکر تاریخ کی ہر کتاب میں کسی نہ کسی حوالے سے موجود ہے‘ بلکہ اگر یہ کہا جائے کہ پشاور کا ذکر کئے بغیر برصغیر (پاک و ہند) اُور بدھ مت کی تاریخ مکمل نہیں ہو سکتی تو غلط نہیں ہوگا لیکن کیا پشاور کی اِس قدیمی و تاریخی اہمیت اور بدھ مت کے مرکزی شہر ہونے جیسی ’مقدس حیثیت‘ کا کماحقہ اِحساس کیا گیا؟ جو دنیا بھر سے سیاحوں کے لئے کشش کا باعث بن سکتا ہے اور بالخصوص ’چین پاکستان اِقتصادی راہداری (سی پیک)‘ جیسے کثیرالجہتی ترقیاتی منصوبے میں جہاں دیگر شعبوں کو ’ترقیاتی حکمت عملی‘ کا حصہ بنایا گیا ہے‘ وہیں بدھ مت (buddhism) کے ماننے والوں کے لئے پشاور کی ’مقدس حیثیت‘ کو مدنظر رکھتے ہوئے اگر خیبرپختونخوا میں ’’مذہبی سیاحت (religious tourism)‘‘ کے شعبے کو بھی توجہ دی جائے تو نہ صرف اِس شعبے میں غیرملکی سرمایہ کاری کے وسیع امکانات موجود ہیں بلکہ پشاور سے عوامی جمہوریہ چین کی محبت و دلچسپی ’سی پیک‘ ترقیاتی منصوبے کے تصور و ارادے سے پہلے ہی سامنے آ چکی تھی اور یہی وجہ تھی کہ ’اُرومچی (Urumqi)‘ کو پشاور کا جڑواں شہر قرار دیا گیا اور پشاور صرف چین ہی کا نہیں بلکہ انڈونیشیا کے مکاسر (Makassar) اور یمن کے صنعاء (Sana'a) کا بھی ’’جڑواں شہر‘‘ قرار ہے لیکن اِس نسبت و تعلق کا پشاور اُور اہل پشاور (عام آدمی) کو کوئی قابل ذکر‘ وسیع البنیاد فائدہ نہیں ہوا تو اِس کے لئے عام آدمی (ہم عوام) نہیں بلکہ مختلف اَدوار کے سیاسی و غیرسیاسی فیصلہ ساز ذمہ دار ہیں‘ جن کا دلی تعلق پشاور سے خاطرخواہ مضبوط نہیں رہا اور اشد ضرورت ہے کہ باہمی تعاون کے وسیع و عریض موجود اور نت نئے امکانات کی تلاش اور انہیں قابل عمل حکمت عملیوں میں ڈھالنے پر توجہ دی جائے۔ بطور خاص یہ امر بھی لائق توجہ رہے کہ ’دسمبر دوہزار تیرہ‘ میں ’اِٹلی‘ کے صوبہ ’نے پُلس (Naples)‘ کے علاقے ’اجے رولا (Agerola)‘ کو پشاور کو جڑواں شہر بنانے کی پیشکش کی گئی کیونکہ سکھ دور پشاور کے گورنر (اٹلی نژاد فوجی) جنرل ایویٹیبل (General Paolo Avitabile) کا تعلق اِسی شہر سے تھا‘ جسے اہل پشاور ’ابوطبیلہ‘ کہتے اور اُنہی کے دور میں قلعہ بالاحصار کی مضبوطی و بلندی‘ نکاسئ آب کے لئے شاہی کھٹہ کی تعمیر سمیت یہاں کے باغات کی خوبصورتی و سرسبزی میں اضافہ کیا گیا لیکن یہ سبھی احسانات اپنی جگہ توسیع اور انہی خطوط پر اگر آگے بڑھائے جاتے تو پشاور پاکستان کا ایسا واحد شہر ہوتا‘ جہاں ترقی یورپی ممالک کی طرز پر مثالی ہوتی۔ ماضی و حال کی ترقیاتی حکمت عملیوں اور ترجیحات کا موازنہ کرتے ہوئے جو بنیادی نکتہ حاصل فکر ہوتا ہے وہ یہ ہے کہ پشاور کی جس قدر ترقی رنجیت سنگھ (Ranjeet Singh) کے دور اُور بعدازاں برطانوی راج کے دوران ہوئی اُس کا تعلق اُور مقصد ’مستقبل کی ضروریات‘ کو مدنظر رکھتے ہوئے کیا گیا جبکہ ہمارے ہاں ترقیاتی حکمت عملیوں کا محورومرکز اور سوچ ’’صرف اور صرف درپیش مسائل کا جز وقتی (ایڈہاک) حل (نمودونمائش)‘‘ ہوتا ہے اُور یہی سبب ہے کہ ماضی و حال کے کئی ایسے ترقیاتی منصوبے ہیں‘ جن کا آج نام و نشان بھی نہیں رہا۔ 

بہرحال ذکر’’پشاور کے مفادات‘‘ اور ترجیحات کا ہو رہا ہے کہ کس طرح بیرون ملک سرمایہ کاروں اور دلچسپی رکھنے والے دوست ممالک کی توجہ حاصل کرتے ہوئے ترقیاتی عمل میں اُن کی شراکت داری ممکن بنائی جا سکتی ہے۔ چین‘ اِنڈونیشیا اُور یمن نے اپنے حصے کا کام کر دیا جبکہ اٹلی کے شہر ’اَجے رولا‘ کے میئر (mayor) کی جانب سے وزیراعلیٰ خیبرپختونخوا پرویز خٹک کو تحریری درخواست معروف برطانوی فلم ساز اُور تاریخ داں ’بوبی سنگھ بانسال (Boby Singh Bansal)‘ کے ذریعے دسمبر دوہزار تیرہ میں پہنچائی جا چکی ہے‘ جس پر تحریک انصاف کی صوبائی و مرکزی قیادت میں متوقع مشاورت ’قومی سطح پر اِصلاحات کے لئے اِحتجاجی سیاسی لائحہ عمل (جدوجہد)‘ کی نذر ہو گئی! 

پشاور کو نظرانداز کرنے کے یہی وہ قابل مذمت روئیے ہیں کہ ہرمرتبہ عام انتخابات کے موقع پر اہل پشاور کی توجہ اِس جانب مبذول کی جاتی ہے کہ وہ ’پشاور کے مفادات‘ کو مدنظر رکھتے ہوئے ایسے اِنتخابی اِتحاد تشکیل دیں‘ جو صوبائی اسمبلی کی گیارہ اور قومی اسمبلی کی چار نشستوں پر ’پشاور کے نام پر‘ پشاور کے لئے ووٹ حاصل کریں اُور جن کے پیش نظر ’سب سے پہلے پشاور‘ رہے۔ چاروں صوبوں کی زنجیر اُور قومی سیاست کے نام پر پنجاب و سندھ کی سیاسی جماعتوں نے جس قدر اِستحصال پشاور کا کیا ہے‘ شاید ہی ملک کا دوسرا کوئی بھی بڑا شہر اِس قدر محروم اُور مسائل سے دوچار ہو! کیا ہم پشاور میں شہری بنیادی سہولیات کے معیار کا موازنہ لاہور‘ کراچی‘ اسلام آباد یا حتیٰ کہ فیصل آباد اُور ملتان سے کر سکتے ہیں؟

مذہبی مناسبت رکھنے والے مقدس مقامات کو بطور ’سیاحتی کشش‘ استعمال کرنے کا نظریہ (تصور) نیا نہیں بلکہ عالمی مثالیں تو اپنی جگہ لیکن صوبہ پنجاب کے وزیراعلیٰ شہباز شریف کی دلچسپی دیکھتے ہوئے ’عالمی بینک‘ نے سکھ مذہب کی پانچ عبادت گاہوں کے لئے مالی امداد دینے کا اعلان کیا اُور یہ اُمید ظاہر کی کہ ’مذہبی سیاحت‘ سے صوبہ پنجاب کو جو سالانہ پچاس لاکھ ڈالر آمدنی ہو رہی ہے‘ اگر بدھ مت کے مقدس مقامات کی توسیع و مرمت اور سیاحوں کے لئے خصوصی سہولیات و مراعات کی فراہمی ممکن بنائی جائے تو یہ سالانہ منافع 30 کروڑ ڈالر سے تجاوز کر سکتا ہے! روئیوں میں تبدیلی کی ضرورت ہے۔ 

نکتۂ نظر وسیع کرنا ہوگا۔ حال سے زیادہ مستقبل کی تہہ دار ضروریات اور تقاضوں کا ادراک ذاتی و نسلی لسانی مفادات کی قربانی چاہتا ہے۔ بار بار (متواتر) یاد دہانی کے باوجود بھی اَگر ’پشاور ایک ترجیح‘ اُور ’پشاور ہی ترجیح‘ قرار نہیں پائے گی‘ اُس وقت تک پشاور پر حکومت کرنے والوں کے نام اُور چہرے تو بدلتے رہیں گے لیکن پشاور کی قسمت نہیں بدلے گی‘ جو پارلیمانی اِداروں میں نمائندگی سے لیکر معاشرتی و سماجی سطح پر تنازعات کے حل اُورترقیاتی ترجیحات کے تعین کے لئے ’وسیع البنیاد اتفاق و اتحاد‘ کی متقاضی ہے۔

Apr2017: Residential and Commercial Boundaries!

ژرف نگاہ ۔۔۔ شبیر حسین اِمام

حدود و قیود!

اہل پشاورکے لئے ’شہری زندگی‘ کی خوبصورتی جیسی اصطلاح کا مفہوم واضح نہیں۔ رہائشی علاقوں میں تجارتی مراکز کے قیام سے شہر کا کوئی ایک حصہ بھی محفوظ نہیں اور عجیب صورتحال یہ ہے کہ ’شہری ترقی‘ کے نام پر ایک سے زیادہ سرکاری اداروں کی موجودگی کے باوجود بھی رہائشی علاقوں کے رہنے والوں کو کم سے کم ذہنی سکون اور احساس تحفظ حاصل نہیں! یہ معاملہ عدالت میں بھی زیرسماعت ہے جہاں سے ملنے والے واضح احکامات کے باوجود‘ بطور تجربہ (ٹیسٹ کیس) یونیورسٹی ٹاؤن میں تجارتی سرگرمیاں ختم نہیں جا سکیں اور اِس بے قاعدگی کا نوٹس لیتے ہوئے ’پشاور ہائی کورٹ‘ نے تیس مارچ کے روز کئی حکومتی اعلیٰ حکام کو طلب کرتے ہوئے واضح کیا ہے کہ اگر ’چیف سیکرٹری’ سیکرٹری لوکل کونسل بورڈ‘ کمشنر اور ڈپٹی کمشنر پشاور‘ عدالت کے روبرو پیش ہو کر (تجاہل عارفانہ پرمبنی اپنے طرزعمل کی) وضاحت نہیں کریں گے کہ آخر کیا وجہ ہے کہ اب تک یونیورسٹی ٹاؤن (رہائشی علاقے) میں جاری تجارتی سرگرمیاں ختم نہیں ہو سکی ہیں تو اِن تمام افراد کے خلاف توہین عدالت جیسی دفعات کے تحت کاروائی عمل میں لائی جائے گی۔ عدالت کی جانب سے مسلسل احکامات نظرانداز کرنے کا معاملہ صرف یونیورسٹی ٹاؤن کی حد تک ہی محدود نہیں بلکہ پشاور کے قبرستانوں میں تجاوزات اور قبضہ مافیا کی کارستانیاں بھی واضح عدالتی احکامات کی کھلم کھلا خلاف ورزیاں ہیں! لیکن چونکہ عدالت کی اپنی آنکھیں اُور کان نہیں‘ اِس لئے جب تک کوئی شخص اِن بے قاعدگیوں سے متعلق عدالت سے رجوع نہیں کرے گا یا پھر ذرائع ابلاغ مفاد عامہ کے ایسے کسی معاملے کو پوری قوت سے بار بار نہیں اُٹھائیں گے اُس وقت عدالت حرکت میں نہیں آتی! اگر ’پشاور ہائی کورٹ‘ قبرستانوں میں تجاوزات کے حوالے سے اپنے ہی احکامات پر عمل درآمد کا جائزہ لے اور معزز جج صاحبان زحمت کرتے ہوئے قبرستانوں کا دورہ کریں تو اُنہیں صرف حقیقت حال ہی نہیں بلکہ برسرزمین حقائق کی سنگینی کا بھی اندازہ ہو جائے گا کہ کس طرح سیاسی جماعتوں کی پشت پناہی سے پشاور کے قبرستانوں کی اراضی ہڑپ کر لی گئی ہے! کس طرح جنازہ گاہ اور چھوٹی مساجد و مدارس کی آڑ میں سینکڑوں قبریں مسمار کر کے رہائشی کالونیاں بنا لی جاتی ہیں‘ جنہیں قانونی طور پر جائز بنانے کے لئے اراکین قومی و صوبائی اسمبلیوں اور سینیٹرز کے ترقیاتی فنڈزسے گلیاں کوچے نالے نالیاں ٹیوب ویل اور بلدیاتی اداروں کے دفاتر قائم کئے جاتے ہیں۔

وزیرباغ کی اراضی بطور خاص جس طرح قبضہ کی گئی اور آج وزیرباغ کی جو حالت ہے‘ اُس سمیت پشاور کے جملہ باغات کا ازخود نوٹس لینا تو بنتا ہے کہ جنہیں کمرشل کرنے کے نام پر ایک خاص جماعت سے تعلق رکھنے والوں کو اجارے پر دے دیا گیا!

پشاور کے سیاسی حکمرانوں نے انتخابی سیاست اور دیگر ذاتی مفادات کو عزیز رکھا اور نتیجہ سب کے سامنے ہے تو جہاں عدالت سرکاری اہلکاروں کی کارکردگی کا احتساب کر رہی ہے تو وہیں پشاور کے ماضی و حال کے سیاسی و بلدیاتی فیصلہ سازوں کے اثاثوں اور مالی حیثیت کا حساب کتاب بھی طلب کیا جائے تو پوری کہانی سمجھ میں آ جائے گی! یونیورسٹی ٹاؤن کے رہائشی علاقے میں غیرسرکاری تنظیموں کے دفاتر‘ تعلیمی ادارے اُور علاج معالجے کے مراکز ازخود قائم نہیں ہوئے‘ کہیں نہ کہیں سے اجازت اور کہیں نہ کہیں سیاسی دباؤ کی وجہ سے چشم پوشی کی گئی ہے۔ اِس معاملے کی سنجیدگی کا اندازہ اِس بات سے لگایا جاسکتا ہے کہ پشاور ہائی کورٹ کے 4 رکنی بینچ جس کی قیادت ’جسٹس وقار احمد سیٹھ‘ کر رہے ہیں نے 4ماہ کا مزید وقت دیا تھا کہ یونیورسٹی ٹاؤن کی حدود میں جاری تمام کمرشل سرگرمیاں ختم کرائی جائیں اور یہ عرصہ بہت تھا لیکن اگر کام کیا جاتا۔ عدالتی احکامات کو خاطر میں نہ لانے والوں کی نیت پر تو شک نہیں کیا جاسکتا البتہ اُن کے عمل سے صاف ظاہر ہے کہ کمرشل سرگرمیوں کے عوض بھاری ماہانہ کرائے وصول کرنے والوں کے مفادات کا تحفظ کیا گیا ہے تو کہیں کمرشل سرگرمیاں جاری رکھنے کی رعایت دے کر بھی کچھ نہ کچھ ضرور کمایا گیا ہے‘ جو یقیناًاتنا زیادہ ضرور ہے کہ ’توہین عدالت‘ کے ارتکاب جیسا خطرہ بھی مول لینے میں قباحت محسوس نہیں کی گئی۔

مسئلہ بیوروکریسی (افسرشاہی) کے شاہانہ مزاج کا ہے‘ جنہیں کسی کام کا حکم ملنا اُور پھر اس کی تکمیل کی توقع رکھنے والے اگر ماضی کی مثالیں ذہن میں رکھتے تو یوں عدالت کا وقت برباد نہ ہوتا۔ عوام الناس کی نظر میں نہ تو قوانین کی اہمیت باقی رہی ہے‘ جس میں خواص کو رعائت دی جاتی ہے اور اِن قوانین و قواعد کا اطلاق صرف اور صرف عام آدمی پر ہوتا ہے۔ قوانین اور قواعد کی تشریح کرنے والا عدالتی نظام کی فعالیت پر بھی سوالیہ نشان لگ چکا ہے‘ جس کے وابستہ عام آدمی کی توقعات پوری نہیں ہو رہیں! کیا کسی نے سوچا کہ جو افسرشاہی ’پشاور ہائی کورٹ‘ کے ’4 رکنی ڈویژنل بینچ‘ کو خاطرمیں نہیں رہی اُس کی نظر میں کسی عام آدمی (ہم عوام) کی بطور سائل وقعت ہی بھلا کیا ہوگی!

تصور کیجئے کہ پشاور ہائی کورٹ نے 30 اکتوبر 2013ء کو ایک حکم دیا تھا کہ پشاور کے رہائشی علاقوں بالخصوص یونیورسٹی ٹاؤن کی حدود میں ہرقسم کی تجارتی (کمرشل) سرگرمیاں ختم کر دی جائیں لیکن ایک طویل عرصہ اور سماعتوں کی تاریخ پر تاریخ تبدیل ہونے کے باوجود بھی ایسا نہیں ہوسکا تو ایسی عدالت کا وقار اور ضرورت ہی کیا رہ جاتی ہے! یقیناًاُس تمام افسرشاہی کا احتساب ہونا چاہئے جو تیس اکتوبر دوہزار تیرہ سے آج تک پشاور پر حکم تو چلاتی رہی لیکن اُس نے عدالتی احکامات کو خاطرخواہ اہمیت نہیں دی۔ سرکاری اداروں کو باسہولت دفاتر اور ضرورت سے زیادہ اختیارات حاصل ہیں۔ تنخواہوں اور مراعات بھی باقاعدگی سے وصول کی جا رہی ہیں تو پھر کام کیوں دکھائی نہیں دیتا۔ بات صرف یونیورسٹی ٹاؤن میں جاری کمرشل سرگرمیاں ختم کرنے کی حد تک کیوں محدود سمجھ لی گئی ہے؟

اندرون شہر کی تنگ گلی کوچوں میں تعمیر ہونے والے کثیرالمنزلہ تجارتی مراکز‘ دکانیں اور مارکیٹیں کیا ’بلڈنگ کوڈز‘ کی خلاف ورزی نہیں؟ پیپل منڈی جیسا تجارتی مرکز کیا رہائشی علاقے کے وسط میں نہیں اُور ’ٹرک اڈے‘ سے دُوری کے سبب کیا پیپل منڈی (ہول سیل مارکیٹ) میں اَجناس کی نقل و حمل کے باعث مقامی اَفراد (اُور ملحقہ رہائشی علاقوں) میں رہنے والے مشکلات اُور مسائل سے دوچار نہیں؟ ضرورت ہے کہ پشاور کے جملہ رہائشی علاقوں کو اُن کا سکون واپس دلایا جائے۔ رہائشی و کمرشل علاقوں کے درمیان فرق (تمیز) موجود ہے‘ جن کی ازسرنو حدود بندی یا پہلے سے مقرر کمرشل علاقوں کی مناسب تشہیر کے ذریعے عوام الناس کو مطلع کیا جائے کہ وہ کن کن علاقوں میں رہائش اور کن حدود میں تجارتی سرگرمیاں کر سکتے ہیں۔

Mar2017: Peshawar; never such before!

ژرف نگاہ ۔۔۔ شبیر حسین اِمام

پشاور: سوچا نہیں تھا!

کارکردگی اَقوال سے نہیں افعال سے ظاہر ہونی چاہئے۔ ’پاکستان تحریک اِنصاف‘ کی صوبائی حکومت اگر ’پشاور سے اِنصاف‘ نہیں کر سکی تو یہ نتیجہ اَخذ کر لینا قطعی منطقی ہوگا کہ وہ باقی ماندہ خیبرپختونخوا سے بھی کئے گئے اپنے وعدوں کو عملی جامہ پہنانے میں ’باوجود کوشش‘ ناکام ثابت ہوئی ہے اُور جب ہم ’پشاور سے اِنصاف‘ کی بات کرتے ہیں تو اِس کا مطلب ’تعمیروترقی سے پیدا ہونے والی وہ ظاہری و باطنی خوبصورتی ہوتی ہے جو 1: مقدار کے لحاظ سے پورے پشاور کی کفالت کر رہی ہو اور 2: وہ معیار کے لحاظ سے پائیدار (دائمی) ثابت ہو۔ یادش بخیر 1996ء میں سیاسی سفر کا آغاز کرنے والی ’تحریک انصاف‘ ’جون 2013ء‘ سے خیبرپختونخوا میں اِتحادی جماعتوں جماعت اسلامی پاکستان‘ قومی وطن پارٹی اور عوامی جمہوری اتحاد کے ساتھ برسراقتدار ہوئی تو ’انتخابی وعدوں‘ کا خلاصہ یہ تھا کہ ’تبدیلی آ گئی ہے‘ لیکن کیا دل پر ہاتھ رکھ کر اُور پشاور کے بحرانی مسائل کی شدت دیکھ کر پشاور کو درپیش مشکلات ماضی کے سیاسی و غیرسیاسی اَدوار سے مختلف قرار دی جا سکتی ہیں؟

صوبائی دارالحکومت پشاور کی خوبصورتی کے لئے اَخذ کی گئی ’حکمت عملی (بیوٹیفیکیشن پروگرام)‘ کی جزئیات کا جائزہ لینے پر جن اَعدادوشمار سے واسطہ پڑتا ہے وہ اِس بات کا بین ثبوت ہیں کہ موجودہ دور حکومت میں جہاں ’خوبصورتی کے لئے مختص مالی وسائل سے پوری طرح استفادہ نہیں کیا جاسکا وہیں (دانستہ یا غیردانستہ طور پر) خوبصورتی ایک ہزار دوسو ستاون مربع کلومیٹر (چارسوپچاسی مربع میل) پر پھیلے پشاور کے چند خاص حصوں تک محدود رہی۔ 

المیہ یہ بھی رہا کہ ماضی کی طرح ’نیک نامی کے لئے فوری اور مصنوعی اقدامات پر اکتفا کیا گیا جیسا کہ جی ٹی روڈ کے مختلف حصوں میں بیش قیمت گملے اور پودے لگانے اور اکھاڑنے کی مشقیں ایک سال میں تین مرتبہ کرنا مالی وسائل کا ضیاع نہیں تو کیا ہے؟

جنوب مشرق ایشیاء کے قدیم ترین زندہ تاریخی شہر پشاور میں فضائی آلودگی بلند ترین سطح (اُس انتہاء) کو چھو رہی ہے‘ جس میں جانداروں کے لئے سانس لینا صحت کے لئے خطرہ قرار دیا جاتا ہے اور اِس سلسلے میں ایک سے زیادہ خود حکومتی اِداروں کی مرتب کردہ رپورٹیں موجود (شاہد) ہیں‘ جن میں ماحولیاتی آلودگی کا ذکر کرتے ہوئے پشاور کے چند ایسے آبادی کے مراکز کی نشاندہی بھی کی گئی جہاں گردوغبار اور ٹریفک کی وجہ سے فضائی آلودگی ناقابل برداشت ہے۔ جی ٹی روڈ پر گلدار پودے لگانے کے لئے نجی اِدارے کو ’30 لاکھ روپے‘ کا ٹھیکہ دیا گیا لیکن پشاور میں داخل اور خارج ہونے کے مقامات پر یہ پودے اِس لئے دم توڑ گئے کیونکہ ہوا میں موجود کیمیائی مادوں کی شرح اور مسلسل بڑھتی ہوئی مقدار‘ گردوغبار پر مبنی فضائی کثافت اور تیزی سے تغیرپذیر موسمیاتی درجۂ حرارت کے اثرات کو خاطر میں نہیں لایا گیا۔ یاد رہے کہ پشاور کی خوبصورتی سے متعلق حکمت عملی کے لئے صوبائی حکومت نے ’1 ارب روپے‘ مختص کئے لیکن ’جون 2016ء‘ تک اِس مختص رقم میں سے قریب نصف یعنی 55 کروڑ ہی خرچ ہو پائے اور اِس خرچ ہوئی رقم کا بڑا حصہ بھی ’جی ٹی روڈ‘ ہی کے حصے میں آیا جہاں 1 کروڑ 80 لاکھ روپے کی خطیر رقم سے ’جی روڈ کے ساتھ فٹ پاتھ اور گرین بیلٹ کی تعمیر کی گئی! 

مالی سال 2016-17ء کی تشکیل کے موقع پر بھی پشاور صوبائی حکومت کے ’پیش نظر‘ رہا اور 9 کروڑ روپے پشاور کی خوبصورتی میں اضافے کے لئے جاری ترقیاتی منصوبوں کے لئے دینے کا فیصلہ کیا گیا۔ آئندہ مالی سال کے لئے بھی توقع ہے کہ 36 کروڑ روپے اِسی مد میں جاری کئے جائیں گے اور یوں ایک پشاور کے نام پر ’’1 ارب روپے‘‘ خرچ ہونے کا عمل مکمل ہو جائے گا‘ جن کا استفادہ صرف اور صرف جی ٹی روڈ کی لمبائی پر ہی خرچ ہوا‘ اور اگر یہ خطیر رقم جی ٹی روڈ کی چوڑائی پر بھی خرچ کی جاتی تو زیادہ پائیدار (اطمینان بخش) نتائج حاصل ہوتے۔ پشاور میں یومیہ ’بارہ سے پندرہ سو ٹن‘ گندگی کی مقدار پیدا ہوتی ہے جس کا ’ساٹھ سے پینسٹھ فیصد حصہ‘ ہی اکٹھا ہو پاتا ہے یعنی پشاور کے طول و عرض میں یومیہ تیس سے چالیس فیصد گندگی پھیل رہی ہے‘ جو تلف نہیں ہو رہی۔ گندگی کے یہ ڈھیر توانائی کے لئے پیداواری ایندھن بن سکتے ہیں لیکن اگر پشاور کے شب و روز‘ مسائل اور وسائل کے بارے سوچا جائے!

پائیدار ترقی ہو یا ظاہری خوبصورتی‘ شہری ترقی کے اِمکانات لامحدود رہتے ہیں۔ کیا پشاور ترجیح ہے؟ فیصلہ سازوں کے سامنے پشاور کے ’’شاندار ماضی کی جھلک‘‘ نہیں‘ جس کی وجہ سے اُنہیں نہ تو زوال پذیری کا اندازہ ہو رہا ہے اور نہ ہی فضائی آلودگی کی اُن وجوہات (اسباب) پر نظر ہے جو خود اُنہی کی غلط منصوبہ بندی کا نتیجہ ہیں جیسا کہ پشاور کے مختلف حصوں میں ٹوٹی پھوٹی سڑکیں اور ٹریفک کے دباؤ سے اُٹھنے والا گردوغبار اور دھویں کے بادل یہاں کے حسن کو مانند کر رہے ہیں۔ 

شہری ترقی کے ادارے کی جانب سے تخمینہ لگایا گیا ہے کہ شہری و دیہی علاقوں میں سڑکوں کی حالت بہتر بنانے کے لئے مزید ’ڈیڑھ ارب روپے‘ درکار ہیں‘ جس کے لئے صوبائی حکومت مالی وسائل فراہم کرنے کے لئے رضامند بھی ہے! پہلے ایک ارب روپے اور اب مزید ڈیڑھ ارب روپے کسی بھی طرح معمولی رقم نہیں لیکن اگر ترجیحات کا تعین کرنے میں ’حکیمانہ غفلت‘ کا مظاہرہ نہ کیا جائے تو اِس قدر مالی وسائل کا زیادہ بہتر مصرف یقیناًممکن تھا اور اب بھی بہتری لائی جاسکتی ہے۔ ہنگامہ خیزی کی بجائے ترقی کا عمل تحمل اور معنی خیز ہونا چاہئے۔ پشاور کے ہر رہنے والے تک پینے کے صاف پانی کی رسائی کا ہدف تاحال حاصل نہیں کیا جاسکا تو کیا یہ امر باعث تفکر و مذمت نہیں ہونا چاہئے؟ ٹوٹی پھوٹی سڑکوں کی قسمت ہو یا پاکستان کا ستھرا ترین اُور غلاظت سے پاک ’مثالی شہر‘ قرار دینے کا ہدف‘ سچ تو یہ ہے کہ پشاور کے حقوق اَدا نہیں ہوئے۔ ترقی و خوبصورتی سے حاصل اہداف اگر پائیدار ثابت نہیں ہوئے تو ذمہ دار (قصوروار) کون ہیں اور ’کسے وکیل کریں‘ کس سے منصفی چاہیں؟‘

تباہی یوں ٹھکانہ پائے گی‘ سوچا نہیں تھا!

پشاور کو نظر لگ جائے گی‘ سوچا نہیں تھا!

کہاں وہ پھول‘ وہ باغات‘ وہ آب و ہوائیں؟

گلی کوچوں سے بدبو آئے گی‘ سوچا نہیں تھا!

Mar2016: Hopes & Disappointments about Regi!

ژرف نگاہ ۔۔۔ شبیر حسین اِمام
اُمید و یاس: ریگی ماڈل ٹاؤن

درخت امن‘ خوشحالی اور زندگی کی علامت ہیں‘ جنہیں اُن کے تعمیروترقی کا استعارہ قرار دیتے ہوئے خیبرپختونخوا کے وزیراعلیٰ پرویز خان خٹک نے روایت شکنی اور غیرمعمولی جرأت و بہادری کا مظاہرہ کیا ہے۔ قابل ذکر ہے کہ ماضی کے حکمرانوں کی طرح جنگلات کے عالمی دن (اکیس مارچ) کے موقع پر وزیراعلیٰ نے نہ صرف خود بلکہ اپنی سیاسی جماعت کے سربراہ عمران خان کے ہمراہ ایک ایسا خطرہ مول لیا‘ جس کا ایک عرصے تک تصور بھی نہیں کیا جاسکتا ہے اور پشاور میں امن و امان کی صورتحال کی بہتری کا ایک ثبوت یہ بھی ہے کہ وزیراعلیٰ جیسی اہم شخصیت ایسے علاقے کا دورہ کرنے گئی جو ’نوگو ایریا‘ سمجھا جاتا رہا ہے۔ وہ اگر چاہتے تو کسی ’سرکاری عمارت یا اپنی رہائشگاہ‘ کے سبزہ زار میں بھی رسمی طور پر ایک درخت لگا کر اُس شجرکاری مہم کا افتتاح کرسکتے تھے‘ جس میں رواں سال دس لاکھ جبکہ پانچ سالہ حکمت عملی کے تحت ایک کروڑ سے زائد درخت لگائے جائیں گے۔ وزیراعلیٰ کے ہمراہ دیگر اہم شخصیات اور اِس موقع پر موجود نوجوانوں کی ایک بڑی تعداد نے ایک ایسی اجاڑ زمین میں پودے لگائے جہاں اِس قسم کی سرگرمیوں کے انعقاد کا تصور تک نہیں کیا جاسکتا تھا اُور اہم شخصیات تو درکنار مسلح پولیس اہلکار بھی دن دیہاڑے جانے سے کتراتے تھے۔ یہ بات وزیراعلیٰ نے اپنے خطاب میں بھی کہی اُور اِس عزم کا اظہار بھی کیا کہ ایک دہائی سے قانونی کاروائیوں کے باعث سردخانے کی نذر ’ریگی (للمہ) ماڈل ٹاؤن‘ نامی ایک معیاری و ضروری ’جدید سہولیات سے آراستہ رہائشی منصوبے‘ کو مکمل کی جائے گا اور اِس اراضی پر ملکیت کا دعویٰ رکھنے والے مقامی افراد کی رضامندی حاصل کی جائے گی۔‘‘

ریگی ماڈل ٹاؤن نہایت ہی خطرناک‘ پیچیدہ اور دیرینہ تنازعہ ہے‘ یوں محسوس ہوتا ہے کہ اِس معاملے کو جتنا سلجھانے کی کوشش کی جاتی ہے یہ اتنا ہی الجھتا چلا جا رہا ہے اور یقینی امر ہے کہ اگر صوبائی حکومت اِس منصوبے کی تکمیل میں دلچسپی لے گی تو مخالفت کرنے والے عناصر کی تسلی و تشفی ممکن ہے۔ یاد رہے کہ 25 برس قبل (سال 1991ء میں) شروع ہونے والا ’ریگی ماڈل ٹاؤن‘ منصوبہ 27 ہزار سے زائد مکانات پر مشتمل ہوگا لیکن چونکہ ’پشاور کے ترقیاتی ادارے (پی ڈی اے)‘ نے منصوبے کے اراضی کی حصول (خریداری) میں خاطرخواہ احتیاط و دردمندی کا مظاہرہ نہیں کیا‘ اِس لئے کئی فریق اِس بنجر زمین کی ملکیت کے اچانک دعویدار بن کر سامنے آگئے اور انہوں نے بھاری رقومات (معاوضے) کامطالبہ شروع کردیا۔ المیہ ہے کہ غلط منصوبہ بندی کی وجہ سے دو دہائیوں سے زائد التوأ کا شکار رہنے والے اِس منصوبے کی تکمیل پر لاگت کا تخمینہ کئی ہزار گنا بڑھ چکا ہے۔ تصور کیجئے کہ جو منصوبہ صرف 7 ارب روپے سے مکمل ہو سکتا تھا اب اُس کی تکمیل کے لئے 35ارب روپے درکار ہوں گے!
پشاور کی آواز (Peshawar Voice) کے نام سے سماجی رابطہ کاری کی ویب سائٹ ’ٹویٹر‘ پر ’ریگی ماڈل ٹاؤن‘ منصوبے کیجانب فیصلہ سازوں کی توجہ مبذول کرانے کی ایک ’خصوصی مہم‘ @Regi_Model_Town کے ہینڈلر سے جاری ہے اور اِس مہم کی حمایت یا اِس میں سرگرمی سے حصہ لینے والے اراکین کی تعداد (بائیس مارچ دوہزار سولہ دوپہر دو بجے تک) 1769 تک پہنچ چکی ہے۔ اِس گروپ کی جانب سے 217 افراد کے دستخطوں سے 2 سال قبل ایک ’کھلا خط‘ بنام عمران خان‘ اسد عمر‘ وزیراعلیٰ پرویز خٹک اُور وزیر بلدیات عنایت اللہ کے نام شائع کیا گیا جس کا یک نکاتی مطالبہ یہ تھا کہ ’’گرین اینڈ کلین پشاور‘‘ نامی مہم میں ’ریگی ٹاؤن شپ‘ کو بھی شامل کی جائے۔‘‘ تنظیم کی جانب سے صوبائی حکومت کی توجہ اِس امر کی جانب بھی مبذول کرائی گئی کہ ’ریگی منصوبے‘ پر کروڑوں روپے خرچ ہوچکے ہیں‘ جن سرکاری ملازمین کو چھت فراہم کرنے اور گنجان آباد پشاور میں رہائش کا مسئلہ حل کرنے کے لئے ایک معیاری منصوبہ تشکیل دیا گیا‘ اُس کے خالق عملی جامہ پہنانے میں ناکام رہے اور اب تک پانچ حکومتیں اِس منصوبے کی تباہی خاموش تماشائی بن کر دیکھ چکی ہیں لہٰذا موجودہ صوبائی حکومت پشاور کے اِس سب سے بڑے اُور منفرد رہائشی منصوبے کی تکمیل کو عملاً ممکن بنائے۔ یقیناًسماجی رابطہ کاری کے ذریعے اپنی آواز حکمرانوں تک پہنچانے والوں کی کوششیں رنگ لائی ہیں اور اُنہیں اکیس مارچ کی تقریب و اعلانات سے راحت کا احساس ہو رہا ہوگا لیکن یہ مسئلہ چٹکی بجاتے حل ہونے والا نہیں کیونکہ جس وقت عمران خان اور پرویز خٹک سمیت اہم شخصیات ریگی کی مٹی میں درخت لگا کر پشاور کی ترقی‘ سرسبزی وشادابی کی دعائیں مانگ رہے تھے عین اُن لمحات میں چند کلومیٹر کے فاصلے پر خیبرایجنسی کی تحصیل جمرود کے ’’غنڈئ چھوٹا نہار‘‘ نامی مقام پر قبائلی عمائدین بشمول اراکین قومی اسمبلی (الحاج شاہ جی اور باز گل آفریدی) جمع ہوئے اُور کوکی خیل قبیلے کے اِن عمائدین نے ریگی ماڈل ٹاؤن کی تکمیل کے حوالے سے صوبائی حکومت کے بیانات و تقریب کے خلاف احتجاجی مظاہرہ کرتے ہوئے دھمکی بھی دی کہ ’’اگر صوبائی حکومت نے ماورائے عدالت (متنازعہ) ’ریگی ماڈل ٹاؤن‘ کو بنانے کی کوشش کی تو نہ صرف تعمیراتی و ترقیاتی کام روکا جائے گا بلکہ پاک افغان (جمرود) شاہراہ بھی ہر قسم کی ٹریفک کے لئے بند کر دی جائے گی!‘‘ ضرورت نپے تلے اقدامات کے ساتھ قبائلی روایات کو سمجھتے ہوئے جرگہ کی صورت متعلقہ قبائلی عمائدین کے ساتھ مل بیٹھ کر مسئلہ حل کرنے کی ہے تاہم اِس حکمت عملی کی کامیابی کے صوبائی حکومت کو بطور فریق سامنے آنا ہوگا۔ بہت سا وقت ضائع ہوچکا ہے اور ریگی ماڈل ٹاؤن کو ایک ماڈل بنا کر تحریک انصاف کی قیادت اپنے اُس انتخابی وعدے کی تکمیل میں ایک اہم سنگ میل عبور کر سکتی ہے جو پشاور میں رہائشی وسائل میں اضافے اور متعلقہ مسائل کے حل کے سلسلے میں اہم سنگ میل ثابت ہوگا۔ ’’اُمیدویاس کی رت آتی جاتی رہتی ہے۔۔۔مگر یقین کا موسم نہیں بدلتا ہے!‘‘

The future of Regi Model Town still not clear as CM KP Pervez Khattak promised to resume the development work

Mar2016: Corruption & Plantation Day

ژرف نگاہ ۔۔۔ شبیر حسین اِمام
شجر کاری مہم: منفی عوامل!

عمران خان پشاور تشریف لائے لیکن خبر یہ ہے کہ اُنہوں نے اکیس مارچ کے روز دوپہر دو بجکر بیس منٹ پر ’ریگی للمہ ٹاؤن شپ‘ کے مقام پر ’شجرکاری مہم‘ کا افتتاح کیا جس سے قبل وزیراعلیٰ خیبرپختونخوا پرویز خان خٹک نے خطاب کرتے ہوئے کہا کہ ’’رواں موسم بہار میں دس لاکھ پودے لگائے جائیں گے جبکہ مجموعی طور پر درخت لگانے کے ہدف کو ایک ارب سے بڑھا دیا گیا ہے۔‘‘ اس موقع پر گرمجوش انداز میں خطاب کرتے ہوئے عمران خان نے کہا کہ ’’پاکستان کی 70سالہ تاریخ سب سے زیادہ درخت خیبرپختونخوا میں لگائے جا رہے ہیں۔‘‘ انہوں نے ’سبز ربن مہم (Green Ribbon)‘ بھی متعارف کرائی جس میں ہر طالبعلم پر زور دیا گیا کہ وہ رواں برس کم سے کم ایک پودا ضرور لگائے۔

پاکستان تحریک انصاف کے سربراہ عمران خان کی خواہش پر صوبائی حکومت ہر سال پہلے سے زیادہ درخت لگانے کی کوشش کرتی ہے تاکہ پانچ سال میں ’ایک ارب درخت‘ نامی شجرکاری مہم کو عملی جامہ پہنایا جاسکے جو نہ صرف خیبرپختونخوا کی معیشت و اقتصادیات پر طویل المعیاد مثبت اثرات مرتب کرے گی بلکہ ماحولیاتی توازن برقرار رکھنے اور بالائی علاقوں میں بارشوں کا اعتدال‘ زمینی کٹاؤ کے کم ہونے اور درجہ حرارت بڑھنے کا عمل روکنے میں بھی معاون ثابت ہو سکتا ہے لیکن شجرکاری مہم کو دیمک کی طرح چاٹنے والے چند ایسے منفی عوامل بھی ہیں جن کی بارہا اِن سطور میں نشاندہی کی جاتی رہی ہے لیکن صوبائی کابینہ کی سطح پر اُن کے امکانی و ظاہری وجود کے بارے سنجیدگی سے غور نہیں کیا گیا اور نتیجہ سب کے سامنے ہے کہ حالیہ چند ہفتوں میں شجرکاری کے نام پر پودوں کی خریداری میں گھپلوں کے انکشاف نہ صرف صوبائی حکومت کے لئے بدنامی کا باعث بن رہا ہے بلکہ شجرکاری مہم جیسی اہم ضرورت کی رفتار بھی سست ہونے کا اندیشہ ہے! علاؤہ ازیں جنگلات میں اضافے کے لئے صوبائی حکومت کے عزم کو لگنے والا دھچکا الگ سے توجہ طلب ہے‘ جس کی جس قدر مذمت کی جائے کم ہوگی!

توجہ رہے کہ خیبرپختونخوا میں شجرکاری مہم کے لئے مختلف اضلاع میں پودوں کی مہنگے داموں اُور من مانی قیمتوں پر خریداری کا معاملہ ’درختوں کے عالمی دن (اکیس مارچ)‘ کے روز منظرعام پر آیا ہے جبکہ بدعنوانی سے پاک طرزحکمرانی متعارف کرانے کا دعویٰ کرنے والوں میں پائی جانے والی مایوسی یقیناًاُن تمام سرکاری اہلکاروں کا کڑا احتساب ہونا چاہئے جنہوں نے ’شجرکاری مہم‘ کی آڑ میں بدعنوانی کرنے کا موقع ہاتھ سے جانے نہیں دیا! قابل ذکر ہے کہ ہرسال اکیس مارچ کے روز ’تین عالمی دنمنائے جاتے ہیں۔ 1: جنگلات کا عالمی دن۔ 2: شجرکاری کا عالمی دن۔ 3: لکڑی کا عالمی دن اُور تینوں ایام کا تعلق ایک ہی شے یعنی درخت سے ہے‘ جس کی اہمیت و ضرورت کو سمجھ لیا گیا ہے لیکن چند ایسے عناصر بھی ہیں جو ترقی کے عمل اور اِس کے مقاصد کے لئے خطرہ بنے ہوئے ہیں اور انہوں نے ’شجرکاری مہم‘ سے ذاتی مفادات وابستہ کررکھے ہیں!

افسوسناک امر ہے کہ خیبرپختونخوا میں شجرکاری کے لئے کی گئی خریداری میں خردبرد سامنے آئی ہے‘ جس کی گہرائی سے جانچ ہونی چاہئے۔ ابتدائی تحقیقات کے مطابق ضلع مردان میں چیر درخت کا ایک پودا چھ روپے جبکہ دیگر اضلاع میں ایک سو روپے سے زائد کے عوض خریدا گیا۔ اسی طرح آم کا پودا جو کہ پشاور کی نرسریوں میں بھی عام طور پر ایک سو روپے قیمت رکھتا ہے لیکن اِس پودے کی سرکاری کاغذوں میں دو سو تیس روپے قیمت ادا کی گئی ہے۔ حد تو یہ ہے کہ شجرکاری مہم کے اخراجات میں سرکاری اہلکاروں نے اپنی صوابدید پر تین ہزار روپے فی پودا خریداری بھی فرمائی ہے جبکہ شجرکاری مہم کی ایک افتتاحی تقریب ایسی بھی ہوئی جس کے لئے 1200 روپے کا پودا خریدا گیا! بے قاعدگیوں کی ایسی درجنوں مثالیں مزید تحقیقات کے لئے خفیہ ادارے کو سونپ دی گئی ہیں۔ اگر ماضی میں اِس طرح کی بے قاعدگیوں کی خاطرخواہ تحقیقات کی جاتیں اور بدعنوانی کے مرتکب افراد کو سیاسی پشت پناہی کی وجہ سے معاف نہ کیا گیا ہوتا تو کوئی وجہ نہیں تھی کہ اِس قدر بڑے پیمانے پر مالی وسائل خردبرد ہوتے۔ محکمۂ جنگلات و زراعت سمیت جملہ سرکاری محکموں میں ’سزا و جزأ‘ کا تصور اور صورتحال انتہائی مخدوش ہے۔ ضرورت اِس امر کی ہے کہ انتظامی عہدوں پر فائز سرکاری ملازمین سالانہ بنیادوں پر اپنے اثاثہ جات سے متعلق کوائف بمعہ بیان حلفی داخل دفتر کریں۔ عجب ہے کہ جملہ سرکاری وسائل بشمول گاڑیوں اور اُن کے ایندھن کی مد میں ہونے والی خردبرد چند ہزار درختوں کی خریداری میں ہوئی لاکھوں ہزار روپے کی خردبرد سے کہیں زیادہ اور مستقل بنیادوں پر ہو رہی ہے۔ اُمید کی جاسکتی ہے کہ وزیراعلیٰ خیبرپختونخوا پرویز خان خٹک ’شجرکاری مہم‘ کی بدنامی و ناکامی کا سبب بننے والے جملہ محرکات کی اصلاح فرماتے ہوئے سرکاری وسائل کی اندھا دھند لوٹ مار کا بھی نوٹس لیں گے اور فوری طور پر ابتدا اِس بات سے کر سکتے ہیں کہ دفتری اُوقات کے بعد سرکاری گاڑیوں کے استعمال پر مکمل پابندی عائد کر دی جائے۔ سخت ترین مالی و انتظامی نظم وضبط لاگو کئے بناء اصلاحاتی کوششیں معنوی و عملی لحاظ سے کافی ثابت نہیں ہوں گی۔

Corruption shadow the plantation drive in KP, Pakistan

Dec2015: Earthquake & Peshawar

ژرف نگاہ ۔۔۔ شبیر حسین اِمام
زلزلہ‘ خوف‘ اندیشے اُور پشاور!

قدرتی آفات کے سامنے کسی کا بس نہیں چلتا اور ابھی سائنسی علوم نے ترقی کے وہ مراتب طے نہیں کئے جن کے بعد زیرزمین مٹی و ریت کی پرتوں میں ہونے والے ردوبدل کے نتیجے میں زلزلے کی آمد و شدت کے بارے پیشگی اطلاع دی جاسکے البتہ جو علاقے زلزلے کا سبب بننے والی زیرزمین پٹیوں پر واقع ہیں‘ وہاں جانی و مالی نقصانات کم سے کم کرنے کے حوالے سے علم و دانش سے استفادہ دنیا کے کئی ممالک میں عملاً دیکھا جا سکتا ہے۔ ماہرین تعمیرات و شہری ترقی کثیرالمنزلہ عمارتیں بشمول مکانات بنانے میں اُس علاقے سے ٹکرانے والے طوفان بادباراں اور زلزلوں کی اوسط شرح کو مدنظر رکھا جاتا ہے اور تعمیرات کے شعبے میں یہ علوم الگ اضافے کی صورت رائج ہو چکے ہیں۔ المیہ ہے کہ ہمارے ہاں نجی و سرکاری عمارتوں اور ترقیاتی منصوبوں کی تعمیر و ترقی اور توسیع میں قدرتی آفات کے اُن ممکنہ حملوں کا خیال نہیں رکھا جاتا جنہیں کی شدت بڑے پیمانے پر جانی و مالی نقصانات کا باعث بنتی ہے۔ کیا آپ یہ پوچھنے کی جسارت کرسکتے ہیں کہ پشاور میں تعمیرات کی نگرانی کرنے والے ایک سے زیادہ اداروں کی کارکردگی کیا ہے؟ جبکہ آسمان سے باتیں کرنے والے پلازے دھڑا دھڑ تعمیر ہو رہے ہیں۔ اسی طرح کیا آپ پشاور کی ترقی کے نام پر نگران ادارے اور بلڈنگ کنٹرول اتھارٹی سے واقف ہیں‘ جو ’’حلقۂ یاراں کے لئے ریشم کی طرح نرم‘‘ مزاج رکھتی ہے!

خیبرپختونخوا کے صوبائی دارالحکومت پشاور کا قدیمی حصہ (اندرون شہر کے علاقے) شدید خطرے میں ہیں۔ ہفتے کی الصبح آنے والے شدید زلزلے سے کئی اندرون ہشتنگری و لاہوری گیٹ میں کئی بوسیدہ عمارتوں کے حصے منہدم ہونے سے درجنوں افراد زخمی ہوئے۔ شکر ہے کہ بڑا جانی نقصان نہیں ہوا‘ جو 90سیکنڈز دورانیئے جیسے طویل زلزلے سے عین ممکن تھا اگر (خدانخواستہ) اِس کی شدت ریکٹراسکیل پر سات درجے سے کم نہ ہوتی۔ تو کیا ہم کسی بڑی آفت اور بڑے پیمانے پر جانی نقصانات کا انتظار کریں یا مناسب وقت ہے کہ ایسی تمام عمارتوں کی قسمت کے بارے میں فیصلہ کرلیا جائے جو رہائش و استعمال کے قابل نہیں رہیں۔

پشاور مرکزی شہر ہے اور یہاں ساٹھ سے زیادہ صوبائی اور وفاقی سرکاری محکموں کے دفاتر موجود ہیں۔ وزیراعلیٰ‘ گورنر اور وزرأ پر مبنی ایک ایسا نگران اور فہم و فراست رکھنے والا گروہ موجود ہے‘ جنہیں عوام کے مسائل‘ اندیشوں اور خوف سے بخوبی آگہی ہے لیکن طرزحکمرانی کا سب سے بڑی خامی یہ ہے کہ حکمراں بننے والوں کا عوام سے دلی رابطہ گویا کٹ سا جاتا ہے اُور طرز حکمرانی کے نظام کی وہ سبھی خامیاں جو بطور حزب اختلاف سیاست دانوں کو دکھائی دیتی ہیں لیکن حکومت ملنے کے بعد رویئے اور ترجیحات یکسر تبدیل ہو جاتی ہیں۔ قول و فعل اور ترجیحات کا تعین کرتے ہوئے طرزعمل میں اس قدر تضاد خود کو عوام کا نمائندہ قرار دینے والوں کو زیب نہیں دیتا لیکن خودفریبی اور خودستائش ایک ایسا لاعلاج مرض ہے‘ جس کی تشخیص (بدقسمتی سے عین) اُس وقت ہوتی ہے‘ جب فیصلہ سازی کا اختیار ہاتھ سے نکل جاتا ہے! التجا ہے صوبائی اور پشاور کی ضلعی حکومتوں سے کہ وہ اندرون پشاور کے اُن تمام بوسیدہ مکانات اور عمارتوں کی قسمت کا فیصلہ کرنے میں مزید تاخیر و کوتاہی کا مظاہرہ نہ کریں۔ ایسی تمام عمارتیں جنہیں ماضی میں خود حکومتی اداروں نے ناقابل استعمال قرار دے رکھا ہے‘ اُن سے کس مصلحت کے تحت چشم پوشی اختیار کی جا رہی ہے؟

ایسے خستہ حال مکانوں و عمارتوں کا شمار سینکڑوں میں ہے‘ جن کی طبعی عمریں پوری ہو چکی ہیں اور زلزلے یا موسلادھار بارشوں کی صورت اُن کے مکینوں کی جانیں مستقل خطرے میں رہتی ہیں۔ صرف بوسیدہ مکانات ہی نہیں بلکہ گذشتہ دس برس کے دوران پشاور میں بننے والی نئی کثیرالمنزلہ درجنوں عمارتوں کی تعمیر میں ایمرجنسی کی صورت باہر نکلنے کے راستے اور آتشزدگی سے بچاؤ کے لئے آلات نصب نہیں۔ پارکنگ کے مختص جگہیں بھی کرائے پر دی گئیں ہیں جو ’قواعد‘ کی کھلم کھلا خلاف ورزی ہے۔ اسی طرح رہائشی و کاروباری علاقوں کے درمیان تمیز ختم ہو کر رہ گئی ہے۔ پشاور کا ایسا کوئی گلی کوچہ نہیں رہا جہاں خستہ مکانات کے نچلے حصے معمولی ردوبدل کے ساتھ کمرشل سانچوں میں نہ ڈھال دیئے گئے ہوں۔ اندرون یکہ توت میں ایک ایسا کثیرالمنزلہ پلازہ بھی ہے جس کے زیرزمین تہہ خانے کو اپنی حد سے بڑھا کر سڑک تک پھیلا دیا گیا ہے۔ ایک عمارت کا راستہ متصل گلی میں سیڑھیاں کھود کر بنایا گیا ہے اور یہ بات خود ’بلڈنگ کنٹرول اتھارٹی‘ کے متعلقہ اہلکاروں کے علم میں کہ کس طرح سیاسی اثرورسوخ رکھنے والوں نے منظور کئے جانے والے تعمیراتی نقشہ جات پر عمل درآمد میں قواعد کی خلاف ورزیاں کیں لیکن عوام کی شکایات کو درخوراعتناء نہ سمجھتے ہوئے واجبی جرمانوں کے ذریعے معاملہ رفع دفع کر دیا گیا۔ حقیقت یہ ہے کہ ادارے بھی موجود ہیں اور اُن کے قواعد و ضوابط بھی جن پر عمل درآمد یقینی بنانے کے لئے بھاری تنخواہوں اور مراعات پر ملازمین کی فوجیں بھرتی کی گئیں ہیں لیکن پشاور یعنی ہم عوام کے مفاد کی بجائے یہ ادارے اور ملازمین اُن شخصیات کے غلام بن گئے ہیں‘ جنہوں نے بھرتیاں‘ تبادلے اور تعیناتیاں اپنے ہاتھ میں رکھی ہوئی ہیں! حکومتیں بدلتی رہتی ہیں لیکن اداروں کی روش وہی کی وہی ہے کہ بظاہر کاغذی کاروائی (فائل ورک) کے تقاضے پورے کئے جاتے ہیں اور افسوسناک حقیقت یہ ہے کہ تعمیراتی کاموں کے ٹینڈر کھلنے سے لیکر اہم عہدوں پر تعیناتیوں تک تعلقات‘ سفارش یا سیاسی وابستگی جیسے حوالے ہی کام آتے ہیں۔ اِس صورتحال اُور پیدا ہونے والے منظرنامے میں تبدیلی کے لئے شعوری کوششوں کی ضرورت ہے‘ جس کے لئے بلدیاتی نمائندے صرف اہم نہیں بلکہ نہایت ہی کلیدی کردار اَدا کرسکتے ہیں۔

ضرورت اِس امر کی ہے کہ اندرون پشاور کے علاقوں (سرکی گیٹ‘ آسیہ‘ رامداس‘ ڈبگری‘ جہانگیرپورہ‘ یکہ توت‘ گنج‘ کریم پورہ سے ہشتنگری‘ اندرون لاہوری و رامپورہ گیٹ بالخصوص فصیل شہر کے داخلی حصوں) میں خستہ حال عمارتوں کا جائزہ (سروے) جتنا جلد ہو مکمل کر لیا جائے۔ اس سلسلے میں امریکہ کے امدادی ادارے ’یوایس ایڈ‘ یا جرمن حکومت کی تکنیکی و فنی اور مالی معاونت کے پشاور میں صدر دفتر سے رابطہ کیا جاسکتا ہے جو اِس طرح کی شہری منصوبہ بندی (سویک پلاننگ) کا وسیع تجربہ و مہارت رکھتے ہیں۔ تاہم سروے کو محدود نہ رکھا جائے بلکہ ہر ایک عمارت کی سن تعمیر‘ ظاہری حالت اور اُس کی باقی ماندہ عمر کا تعین بھی ایک ہی سانس میں ممکن ہے۔ گلوبل انفارمیشن سسٹم (جی آئی ایس) کے تحت پشاور کی ہر گلی کوچے کا نقشہ اُور آبادی کے اعدادوشمار بھی اِسی کوشش میں مرتب کئے جا سکتے ہیں جس سے پشاور میں بنیادی سہولیات کی فراہمی کے نظام کی ضروریات معلوم ہو سکتی ہیں۔ سردست پشاور کی آبادی اور اس کے لئے پینے کے صاف پانی کی فراہمی‘ نکاسی آب‘ کوڑا کرکٹ (ٹھوس گندگی) اُٹھانے کے نظام اور دیگر ضروریات کے تعین کا تازہ ترین سروے موجود نہیں۔ اگر اپنے وسائل سے استفادہ مقصود ہو تو صوبائی حکومت کے پاس ’جی آئی ایس‘ کے آلات اور تربیت یافتہ عملہ موجود ہے جس نے کامیابی کے ساتھ تعلیمی اداروں کے اعدادوشمار جمع کئے ہیں اور بناء کسی اضافی اخراجات اِسی ’ایجوکیشن منیجمنٹ انفارمیشن سسٹم (ای ایم آئی ایس)‘ نامی شعبے کی خدمات سے استفادہ کیا جاسکتا ہے جسے نہ صرف پشاور کے مزاج و گلی کوچوں کا علم بھی ہے بلکہ اسے مقامی آبادیوں بالخصوص ایسے مضافاتی علاقوں میں کام کرنے کا تجربہ بھی ہے جہاں انسداد پولیو مہمات سمیت کسی بھی کام کے لئے جانے والے سرکاری اہلکاروں کو حفاظتی حصار کی ضرورت ہوتی ہے۔ ضلع پشاور کی سطح پر ’جی آئی ایس‘ سروے کے لئے جامعہ پشاور کے شعبہ جات اور طلباء و طالبات کی خدمات سے بھی استفادہ کیا جاسکتا ہے‘ جو اِس ٹیکنالوجی میں درس حاصل کررہے ہیں اور اُنہیں عملی تجربے کی ضرورت ہوتی ہے۔ اگر پشاور کی سطح پر صفائی کے لئے رضاکاروں پر مشتمل ٹیمیں بنائی جا سکتی ہیں تو ایک ایسے مقصد کے لئے غوروخوض اور عملی مشقیں کیوں نہیں کرائی جاسکتیں جن کا تعلق انسانی جان و مال کو محفوظ بنانے سے ہے؟